مش طالبه غير الغفران

نفسي أرسي علي شط الأمان , نفسي أحس إن البركان اللي جوايا بقي في انعدام , شوية فوق وشوية تقصيري بياخدني لكل انهزام , ليه مش بنفضل صح علي طول إذا كنا في قربه ومرضاته بنكون آخر تمام , بنبقي عارفين الغلط غلط قبل ما نعمله وبنعمله وبيبعدنا عنه وبنتوه وسط الزحام , زحام من خطايا وذنوب وصغائر بتتجمع علينا لغاية ما تبقي كبائر ومع ذلك بنبقي آخر روقان , بنبقي مبسوطين ومش حاسين بنضحك ونقول ربنا غفور ورحمن , وبعدين معاكي يا دنيا مش هتسبينا في حالنا لا وكمان هي ناقصة الشيطان , منك لله يابعيد نفسي أفرح فيك وانت بتتزف للدرك الاسفل من النيران , أجمل إحساس لما بحس إن ربنا راضي عني ومش غضبان , طيب وبعدين مع النفس الامارة بالسؤ دي ماتهمدي بقي هتوديني لفين كمان , يارب محتاجه لك قادرعلي كل شيء قويني واحميني نفسي أنتصر علي كل أعدائي وما أبقاش في انهزام , نفسي أرضيك وأكون قريبه ليك نفسي يفرح بيا حبيبي لما يشوفني عليه أفضل صلاة وأزكي سلام , إمتي بقي أرتاح منك يا دنيا مش عايزة اعيشك زهقت من مكرك وخداعك بجد إختبار صعب يارب مش طالبه غير الغفران .